Alfashlus sadisu fibayaani Qadhail Hajati Wal istinjaa i
Pasal nyang keunam jinoe meuhat
Qadha hajat loen boeh sinoe
Qadha hajat na teu lhee ban
Deungoe tuan aduen adoe
Bak uruek lhok bak tanoh crah
Bek iek taprah tapeu danoe
Sira neu dong nayang that meukroeh
Saket tuboeh mengap dumpoe
Teupat nyang mee Qadha hajat
Jamboe madat geulanggang tajoe
Teupat judi ngoen meutaroeh
Sinan haroes taboeh duroe
Ohnoe habeh teumpat meukroeh
Ngon nyang haroeh ban dua phoe
Jinoe loen peugah buet nyang sunat
Loen peuingat soe nyang pakoe
Sunat tamee ie ngon batee
Tatoep ulee geulinyueng droe
Tamong gaki dilee balah wie
Sunat lagi wahee adoe
Oh tatamong dalam bagan
Tabacakan lee doa nyoe
Allahumma Innii A`uzubika minal
Khubutsi Walkhabaits habeh ohnoe
Doa pih teuleuh ka keuh simpan
Duek lam bagan teuma sidroe
Wie ngon uneun bek tapandang
Teuman tangan bek meusakoe
Najis teubiet bek tapandang
Langet manyang bek kalon droe
Barat bek teupat timue bek timang
Siroeng gunteng ta paleng droe
Lidah bek mariet jaroe bek meuyoek
Muka angen bek hadap droe
Oh ka suci nab ngon dilikoet
Sunat neuseuboet doa meunoe
Allahumma Thahir Qabli Minan Nifaaqi
Wa hasin Farji Minal Fawahis
Teuma tabeudoh jeut beurdiri
Doa Nabi tabaca meunoe
Ghufranakal Hamdu Lillahillazii
Azhaba A`nil Azaa Wa aa`fani
Teubiet sinan uneun dilee
Yue Pang ulee Nabi geutanyoe
La Ilaha Illallah
Nikmat meutamah soe nyang pakoe
Nyoe na sboh pantone Aceh
Lafadh shareh makna adoe
Nariet meupadan khabar meusamboet
Rijang lagoet soe nyang pakoe
Takoh bak joek peuget keulam
Ta peugot kulam teumpat manoe
Oh katroeh balegh anauk islam
Wajeb tafham dum hukoem nyoe
Fardhu suci qadha hajat
Ciet wajeb that tameurunoe
Takoh kayee peugot meunasah
Mita ilah taboh taloe
Tameuguree teuntee bak syekh
Tapeusaheh hukoem manoe
Bek jeut gata misee hewan
Bek misee ban kameng manoe
Fardhu manoe han jitupat
Ladum syahadat pih tan meuhoe
Nyang keuh hudep sang bak kayee
Jeut keu jujai apui tungoe
Bak si sumpueng di bineh blang
Bak keutapang di teungoh nanggroe
Manoe hanjeut syahadat alang
Duek lam bimbang malam uroe
Takoh taroek peuguna wah
Pageu reubah trieng meuduroe
Akhee doenya kureung tuah
Soh meunasah jeut-jeut sagoe
Aneuk miet beut hana sapat
Timue barat meunasah boe
Nyang na ramee barang kapat
Oh katroeh hat uroe gantoe
Buleun sya`ban toe ramadhan
Ramee yoeh nyan shallo aloi
Puasa teuleuh fitrah hasee
Soe hireun lee meunasah keudroe
Le nyang ramee dua teumpat
Jamboe madat geulanggang tajoe
La-en nibak nyan teumpat hiburan
Inong agam dum meucawoe
Uroe pih beungoh kana tujuan
Muekhem meukhap malam uroe
Dara pih meunan agam pih meunan
Ji pateh han tapeurunoe
Pat jideungoe na hiburan
Sampee malam han jitee droe
Meugrum geundang meu aloen bansi
Ji deungoe lee saree meusahoe
Mita lee cara jeut keu modal
Soek ngon ikal soek di jaroe
Ladum sawak ija pinggang
Meuhoi lee nang ladum adoe
Nyoe woe sinan jak meutendang
Sawak panggang roya rayoe
Hantee keudroe le meujalang
Woe ugampoeng lagee giloe
Ureung lakoe dijih saban
Jak meukawen lee meutaloe
Adak siku jeh ngon siku nyoe
Sabee laloe tip-tip masa
Jeut-jeut jamboe raja meukandrang
Jeut-jeut geulanggang ramee tajoe
Jeut –jeut taloe krueng jeut bineh blang
Jak meurantang sama tajoe
Keunan bimbang dumna rakyat
Bak mumadat ngon meutajoe
Keu ileumee han ji ingat
Keu ibadat han ji pakoe
Ladum galak ubak meukat
Jak hareukat malam uroe
Mita meuneukat peu meuteumeung
Agen pineung jeut-jeut nanggroe
Oh ji tamong laba meuneukat
Peng jilipat woe bak tajoe
Ureung sulet miet na teumpat
Meunan adat akhee nanggroe
Laba meutamah bak meuneukat
Pangkal singkat jeut lom rugoe
Yang keuh meunan ladum rakyat
Maseng tingkat syetan peucawoe
Eh niet manoe pih han mupat
Keu makrifat puelom taproe
Rukoen seumbahyang hana teupat
Ladum syahadat hana meuhoe
Uroe pih beungoh jak meudendang
Woe oh malam bak rumoh droe
Ladum lalee bak hareukat
Ladum rakyat lalee keudroe
Ladum seutuju ulee balang
Sinan bimbang malam uroe
Teuma ji pajoeh peu nyang geubrie
Jeut pancuri akhee dudoe
Khabar maklum dum bak sahbat
Loen peuingat bek that laloe
La Ilaha Illallah
Pujoe allah malam uroe
Pasal nyang nam ka seuleusoe
Tujoeh jinoe mee takira
