HIKAYAT AKHBARUL KARIM KEUNEUBAH GUREE, TEUNGKU SEUMATANG
Akhbarul karim loen calitra
Awai wajeb bak mukallaf
Mengucap Syahadah
Kalimah Dua
Syahadat Tauhid Syahadat Rasul
Dalam Ushul Dhahir nyata
Asyhaduallailahaillallah
Wasyhaduanna Muhammadarrasulullah
Ku ek saksi Phoe keu Tuhan
Hana laen seubagoeNya
Zat ngon sifeut na bak Tuhan
Hana saban misee Hamba
Hana jaroe hana gaki
Maha suci Allah Ta`ala
Ku ek saksi Nabi Muhammad
Peusuroeh Jeup Alam donya
Suroeh Tuhan bak jen insane
Troeh bak ikan nyang mee donya
Bak binatang kayee bate
Troeh Pang ulee keupadNya
Nabi Muhammad Aneuk Abdullah
Di Nanggroe meukah asi mula
Kuchiek Neuhoi Abdul Muthaleb
Bangsa Arab Nabi Mulia
Poma neumeuhoi Siti Aminah
Siti Halimah nyang peulara
Nyan peumom Rasulullah
Meunan peuneugah dum Ulama
Rupa Nabi sangat indah
Seu ulah ban buleun purnama
Soe nyang pandang mata lazat
Pinsan rakyat jieu rupa
Kulet puteh meujampu mirah
Siulah ban bungong jeumpa
Lama peut ploeh thoen di nanggroe meukah
Umadinah teuma neubungka
Teutap Nabi di madinah
Peurintah Allah A`zawajala
Neubeudoh hana khali
Neuprang kapee hana reuda
Nabi nyang laen meulaksa ribee
Leubeh pang ulee Nabi kita
Nyan awai phone Nabi Adam
Kesudahan Nabi Mushthafa
Kubu Nabi di madinah
Ureung ziarah meuribee laksa
Allah bri beurkat bak geutanyoe
Seubab dua droe ureung mulian
Habeh Khabar makna syahadat
Makrifat jinoe takira
Jinoe loen boh maseng pasal
Mangat takeunal maseng tangga
Geunab sipoeh pasal disinoe
Deungoe hai adoe uloen calitra
Maseng pasal nyan siploeh nyoe
Bek beu o-beu o geutanyoe baca
teuntang Ma`rifat Pasal peurtama disini
